Dat, wat mir virun zwee Joer scho gesot hunn, ass haut elo Realitéit: déi onméiglech Bréck iwwert d’Neiduerf wäert méi wei 40 Mio. kaschten! Deemools huet de Schäfferot eis ausgelaacht. Mat Sécherheet geet dat nach net duer, well et steet jo nach ëmmer kee Steen um aneren. Rieds geet vun engem Plus vun 30 Prozent – aus der Täsch vum Steierzueler. Wat seet de bloe Conseiller, dee viru Joren am Neiduerfer Schoulhaff stoung a sech um Mikro vun RTL echaufféiert huet, dës Bréck géif ze deier ginn? Wéi steet säi Parteikolleeg, de Fitschert, dee Mobilitéitsschäffen ass, dann haut zu senger Ausso: „Versprieche gehalen?“ Dës Bréck schéngt just e Gefale vun dësem Schäffen un „déi gréng“ ze sinn, vun deenen hie sech Stëmmen erwaart, fir erëmgewielt ze ginn. A wat seet d’Buergermeeschtesch dann dozou? De Kanal am Neiduerf war hir ze deier ginn an se huet sech deemools massiv driwwer opgereegt. Dee Kanal ass awer vill méi wichteg wéi dës Bréck. Geheit d’Madamm sech bei dësem onnëtze Projet da grad esou an d’Broscht? An da schwätzen déi do vun Ëmweltschutz!