Forum von Georges Engel
Tëschent Selbstduerstellung a politescher Realitéit
Mam Amtsuntrëtt vum neien Aarbechtsminister soll alles besser ginn. Virun allem a punkto Sozialdialog. Dat hofft zumindest d’Regierung. Mee eng kleng Analyse vun der Lag weist, datt dat wuel e fromme Wonsch bleiwe wäert. Well de Probleem ass vill méi déifgräifend, wei datt e just un enger Persoun festgemaach ka ginn. An ee fänkt beim Premier un.
Premierminister Luc Frieden Foto: Editpress/Julien Garroy
Zanter sengem Amtsuntrëtt ass de Premier beméit, sech als deen duerzestellen, dee Stabilitéit, wirtschaftlech Kompetenz a Rou an d’Land bréngt. Mee verschidde politesch Indicateuren an d’Perceptioun an der Bevëlkerung zeechnen e vill méi nuancéiert an däitlech méi kritescht Bild. Eent vun engem Premier, dee sech selwer mol als CEO bezeechent huet, mee dee kee Gefill huet fir de Sozialdialog. Dobäi ass de Sozialdialog de Garant schlechthi vun der politescher a sozialer Stabilitéit, déi de CEO awer sou gären an d’Vitrinn stellt, fir Betriber unzezéien. E gudde Premier ass een, deen et fäerdegbréngt, d’Sozialpartner zesummenzebréngen, ze vermëttelen an a schwieregen Dossieren e Kompromëss ze fannen.
