La meilleure des fêtes, c’est la retraite!

Als einfache Bierger erlaben ech mer e puer Iwwerleeungen am Zesummenhang mat Souveränitéit a Fräiheet. Eng Zäit geet op en Enn, eng aner fänkt un. D’Iwwergab vun der Muecht vum Henri u säi Jong Guillaume huet en natierlechen Ëmschwong an der Kontinuitéit vun eisem Land markéiert.

All Muechtwiessel erweidert eise Bléck op Muecht, op Souveränitéit an op dat, wat bleift, wann eng Funktioun ophält an eng aner ufänkt.

Et gëtt vill vun Autoritéit, Ënnerschrëften a Verantwortung geschwat. Mee eng absolut Souveränitéit gëtt et net. Net fir e Staatschef an net fir eng Regierung. Net emol fir e Vollek – also fir „Jänni a Männi“. Si ass ëmmer agegrenzt, equilibréiert a limitéiert. An genee dat mécht eng Demokratie aus.

Déi richteg Gréisst vun enger Funktioun läit net an der Muecht, déi si huet, mee an der „délicatesse“, mat där si ausgeüübt gëtt. Déi rezent Diskussiounen ëm d’Verfassung, Reformen oder Ënnerschrëften hu gewisen, wéi delikat dat institutionellt Gläichgewiicht ka sinn. Et ass ëmmer gesond, wann diskutéiert gëtt, an et ass ëmmer gesond, wann et Meenungsverschiddenheete gëtt, well eng lieweg Demokratie keng „arguments contraires“ fäert.

An enger Zäit, wou d’Indifferenz ëmmer méi Plaz an eisem Alldag anhëlt, huet beispillsweis de Maître Gaston Vogel – eng bewonnert an och kontrovers Perséinlechkeet, déi eis viru kuerzem fir ëmmer verlooss huet – ëmmer nees drun erënnert, datt näischt méi geféierlech ass wéi Gläichgëltegkeet. Et huet een seng Positiounen net missen deelen, mee hie stoung konsequent fir d’Meenungsfräiheet. An dat ass vläicht dat Wichtegst, wat hien eis hannerlooss huet.

D’Pensioun, dacks als Réckzuch ugesinn, ass a Wierklechkeet eng Befreiung. Si hëlt d’Laascht vum Protokoll, si gëtt der perséinlecher Stëmm nees Plaz, si erlaabt et, nees einfach Bierger ze sinn – ee vun „Jänni a Männi“.

„La meilleure des fêtes“ ass am Fong net déi vun den Éieren. Et ass déi vun de „libertés retrouvées“.

Mat Respekt virun den Institutiounen, mat Vertrauen an déi nei Generatioun an a déiwer Verbonnenheet mat „Jänni a Männi“ an onsem „Ländchen“.