De Centre national de l’audiovisuel zu Diddeleng ass aktuell quasi ganz zou. Et gëtt keng Ausstellung an et ass och keng ugekënnegt. D’Archiver waren e ganzt Joer zou. De Ciné Starlight ass elo an der Héichsaison och dräi Méint zou. An hiren Internetsite kéinten se och zoumaachen, well deen ass quasi eidel. Trotzdeem passéiert um CNA vill, awer net vill Schéines. Hei eng Auswiel.

2017 huet den däitsche Sammler Lutz Teutloff dem CNA seng wäertvoll Kollektioun vu Fotoen uvertraut, déi en am Esprit an am Dialog mat der „Family of Man“-Ausstellung vum Edward Steichen realiséiert hat. Dat war eng Unerkennung fir déi excellent a seriö Aarbecht, déi de CNA am Déngscht vun der Fotographie iwwert 30 Joer laang gemaach huet.