Buchkritik
Vun erënneren a verdrängen: E Bléck op dem Guy Koenig säi „Vergissmeinnicht“
Dem Guy Koenig säi leschte Roman „Vergissmeinnicht“, 2024 bei Op der Lay erauskomm, ass eng Kriminalgeschicht, déi 25 Joer nom Zweete Weltkrich u Strofdoten aus dëser Zäit uknäppt an domadder d’Nokrichszäit thematiséiert. E Bléck an d’Buch.
2024 bei Op der Lay erauskomm: „Vergissmeinnicht“ Cover: Op der Lay
Op engem 26. Dezember muss de Commissaire Bertemes an d’Éislek fueren. An engem Hotel zu Dierbelt gouf den Egon Schmit erschoss: e pensionéierte Hauptmann bei der Bundeswehr. Hie war anscheinend Fallschiermjeeër wärend dem Krich an een, deen an engem Nopeschduerf eng Famill aus engem brennenden Haus gerett huet. Datt den däitschen Offizéier (e Preis, wéi d’Leit et 1969 nach gesot hunn) niewent e puer amerikanesche Veteranen op eng Commemoratioun vun der Rundstedt-Offensiv ageluede ginn ass, huet e staarken Débat am Duerf ausgeléist.
