Luxemburgensia
Eng Lektür, bei där een net aschléift: „Pillem oder Këssen“ vum Roland Harsch
Wéi ee schloflos Nuechten gutt notze kann, mécht den Auteur Roland Harsch mat sengem charmante Buch „Pillem oder Këssen“ vir. Déi vill kleng Texter, déi alleguer zu enger ganz spéider respektiv zu enger ganz fréier Auerzäit entstane sinn, thematiséieren alles, wat mat der Nuecht ze dinn huet – mee awer och méi wéi dat. Virun allem bréngen se een zum Laachen.
Als Jong vun engem Militärmuseker ass de Roland Harsch scho fréi a Beréierung mat Musek komm – seng Léift fir se duerchdréngt dann och vill Texter aus „Pillem oder Këssen“ Foto: Éditions Guy Binsfeld
Wann een op lod.lu déi lëtzebuergesch Iwwersetzung vum däitsche Wuert „Schabernack“ sicht, späizt den Online-Dictionnaire leider just dat heiten eraus: „Mengt Dir eventuell … schlabbere?“. Mat schlabberen huet dem Roland Harsch säi Buch „Pillem oder Këssen“ an éischter Linn näischt ze dinn – quitt datt den Auteur selwer villäicht amstand wier, e Lien ze maachen –, mee dofir ëmsou méi mat deem, wat Schabernack ëmfaasst: nämlech Jux a Spaass, dëst am Fall vu „Pillem oder Këssen“ a cleverem Ëmgang mat Sprooch an de verschiddene literaresche Gattungen.
